Aningaaserivinni ileqqaakkat akileraarutitigut oqilisaaffigineqarnissaat pillugu Namminersornerullutik Oqartussat nalunaarutaannut nr. 13, 31. maj 2000-imeersoq
Aningaaserivinni ileqqaakkat akileraarutitigut oqilisaaffigineqarnissaat pillugu Inatsisartut inatsisaanni nr. 2, 6. maj 1989-imeersumi § 10 naapertorlugu inatsisartullu inatsisaanni nr. 2, 23. maj 2000-eersukkut kingullermik allanngortinneqartumi makku aalajangersarneqarput:
§ 1. Aningaaseriviit, aningaaserivinni ileqqaakkanut akileraarutitigut oqilisaaffigineqartunut kontunik pilersitsisut aaqqissuussamik isumaginninnerminni suliassat makku isumagisassaraat:
1) Kontumik piginnittup aqqa, inuttut normua najugaalu ilisimassallugit.
2) Ileqqaakkanut akiliinermi piumasaasut tamatigut naapertorneqarnissaat nakkutigissallugu.§ 2. Ajunngitsorsiatut erniat erniatigullu tapiissutit akileraaruteqaataasussaanngitsut aatsaat tunniunneqassapput kontumik piginnittup, ileqqaakkat siunertamut akuerisaasumut atorneqarnissaat aningaaserivimmut uppernarsarpagu kiisalu kontumik piginnittoq uppernarsaammik atsiugaqarpat.
Imm. 2. Uppernarsaalluni atsiugaq uppernarsaammik ilaqartillugu aningaaseriviup Akileraartarnermi Pisortaqarfimmut nassiutissavaa, aningaasat ileqqaakkat siunertamut sumut atorneqartussatut tunniunneqarsimanersut nalunaarlugu.§ 3. Akileraartarnermi Pisortaqarfik isumaqatigiissuteqarfigalugu aningaaseriviup ukiut tamaasa 31. december-imi naatsorsukkat, kontut ataasiakkaat pillugit paasissutissanik imallit akileraartarnermut oqartussaasunut nassiuttassavai.
§ 4. Kontut ataasiakkaat pillugit paasissutissat Akileraartarnermi Pisortaqarfiup aningaaserivinnut qinnutigisinnaavai.
§ 5. Kontut amerlassusii, uninngasuutigineqartut il.il. pillugit nalunaarusiamik qinnuigineqarnermigut aningaaseriviup Akileraartarnermi Pisortaqarfik nassittassavaa.
§ 6. Paasissutissiisussaanerup qanoq ingerlanneqarnissaanut maleruagassat sukumiinerusut Akileraartarnermi Pisortaqarfimmit aalajangersarneqassapput.
§ 7. Nalunaarut atortuulissaaq ulloq 15. juni 2000.
Imm. 2. Tamatumunnga peqatigitillugu akileraarutitigut oqilisaataasumik ileqqaarnernut aaqqissuussinerit pillugit nalunaarut nr. 23, 15. juni 1989-imeersoq atorunnaarsinneqarpoq.
Namminersornerullutik Oqartussat, ulloq 31. maj 2000.
Josef Motzfeldt
/
Kaare Hagemann